CUANDU SEAMUS VIEJUS II

Crónica desde la Ronda de la Pizarra

Recuedu jaci muchu tiempu,

muchu añus ya jaci de estu,

cuandu me igisti,

¡Ay, cuandu seamus agüelus.

jaci muchu tiempu,

muchus añus jaci ya de estu

que yo le ije a mi Antonia,

¡Ay, cuandu tengamus un nietu.

Primeru llegarun los ijus,

Y llenarun la casa de risas y juegus

de nochis en vela, por algún paecimintu

por enferme'a de los chiquinjus, de fiebris y esu,

peru vos nos llenó de emocionis

que to’o son alegrías, cuandu la jistoria

va de nacementus

llegarun comu tormenta en tiempu de

calma del vientu, comu volcán en

erupción donde anti solo jabia tranquiliá

y sosiegu,

y tu, contenta de ver pasal el tiempu,

de un mes de febreru jablamu, que

La jultima fue a mitad de un mes de

junio el nacementu,

mes de las nochis

mágicas y largas, cuandu ya la caló de

la canicula nos jaci pedil tregua,botijo

gazpachu, y un bañu en la charca del pueblu

con las tardis de siesta, y la nochis en el

zaguan de casa sentau en sillas de enea

esperandu en la nochi el frescu y

sitiendu los días de su’ol, en los

campus de labranza, que nos da el sustentu

más la vi’a pasa, con impetu,

los añus paecin mesis

los mesis semanas, las semanas días, y los días

un suspiru, que asina debió ser desde

el principiu, desde en comienzu

Recuedu jaci muchu tiempu,

muchu añus ya jaci de estu,

cuandu me igisti,

¡Ay, cuandu seamus agüelus.

Los Ijus que ya crecierun

que con los añus se juerun

a vivil sus propias vi’as

a captural nuevus vientus

p’a navegal por el mundu

a buscal su destinu, un destino inciertu

que la vi’a es m’u mala,

m’u puta, p’al que tie que sembral su juerto,

Recuedu jaci muchu tiempu,

muchu añus ya jaci de estu,

cuandu me igisti,

¡Ay, cuandu seamus agüelus.

Ya están aquí, ya llegarun los nietus

Ya en tu cumpleañus,

ties la casa llena de ellus

que vienin a felicitarti, por ser

dia grandi p’a ti y p’a t’os ellus

ya el dia de Reyis, llenan tu casa de

risas infantiles, juegus y cuentus,

y tu Antonia, ¡Ay, cuanti te alegras de velos,

de su vitalia de sus contentus

por que dispue de la felicia de los hijus

vieni la felia de los nietus

y te disgustas con sus digustus, y sonries

con sus contentus

ya tiene a tós en la mesa, con lo que aiga

compartiendu, que en casa de probes

jamás se jacin miramientus,

ya los ti’es a tós en la mesa,

con lo que aiga repartiendu

hijas, yernus y nietus.

Y jay que vel la cara de felicia que se te poni

Cuandu estas juntu a ellus.

Ya los ti’es a t’os reunios, ya están t’os

contentus, con la alegria de dia feriadu

que de días de tristezas los jay por cientu.

Los nietus en su mesa, en su sitiu las hijas y yernus.

Y yo to’via Recuedu jaci muchu tiempu,

muchu añus ya jaci de estu,

cuandu me igisti,

¡Ay, cuandu seamus agüelus.

jaci muchu tiempo.

muchus añus jaci ya de estu

que yo le ije a mi Antonia,

¡Ay, cuandu tengamus un nietu.

Cáceres año nuevo 2023

Agustín Díaz Fernández