LAS CUENTAS DEL VIEJU

ANGEL MARINA

DESDE MI RICÓN

Guadalupe 1917

Las Cuentas del Vieju

Caleru y Pintau

Sumisus arabán

La manu en la esteva

Tiu Tanasiu marcha

Y va echandu el probi

Sus cuentas galanas

-Aunqui es tierra floja

Aunqui es tierra mala

Eschandoli istiercul

Con mucha abundancia

Malu ja de sel, que no coja

siquiera pa gastu de casa

y diciendu estu

el gañan clavaba

hasta la macera del vestuto aradu

en la tierra blanda

Pintau y Caleru

La cervid bajaban.

Y crujir jacian

Las coyundas, la esteva y la cama

¡arriba Caleru!

Pintau baja, baja,

Aunqui arrecoja setenta janegas

Que jacin güena falta

Treinta le debemus

Y cuarenta gastamus en casa

Pos son ocho hijus, más toos tan chiquinus

Que solo el más grandi dellos

Guardandu unas vacas

El pan que se comi

Se pue icil que gana

Y bien que me dueli

Que este aguantandu el friu y la escarcha

Más ¡semos tan probis!

¡jaci tanta falta!

Ese poquinu

Que el muchachu gana

Si tuviera muchu

Yo respondu que el mi chiquinu estaría en la escuela

Aprendiendu cosinas mu guapas

¡arriba Caleru!

¿Pintau baja, baja

¡ah, me caso en cribas!

¡tengu yo unas ganas

De que los mis niñus se jagan talluus

Pa poel descansar una miaja

Aunqui yo no piensi dejal el trabaju

Jasta que abarranqui y me que en casa

Por donde la lumbri, dil yo dirigiendo

La labor que se jaga

Y cuando se casín y toos se me vayan

Y yo me que solo

Sin poel valermi y jechu una lastima

Tan solo les pio

Que me guardin ca uno en su casa

Un rincón de la lumbri en inviernu

Y que, en el escañu, me jagan una cama

De comel, poco

Unas sopas claras

¡Pintau, que te salis

¡Entra en la besana!

II

Me lo diju llorandu, llorandu

Mientras por la puerta su pan mendigaba

-ellus no son malus señol,

Son las nueras que los engañan

Ellus no me echan señol, fuy yo que vi que estolbaba

Señoritu, no crean lo que dicen,

Que mis hijus me echarun de casa, ellos no son malos

¡más cundi tan poquinu el jornal que ganan!

III

Entri dos lo llevan

Naide lo acompaña

¿y los hijus? Los hijus,

Sembrandu, allá en la besana

Si, han sábidu de la muere del padre

Pero esta la tierra tan suelta,

Tan blanda

Que dejal perder tal temperu

Seria una lastima

Angel Marina

Guadalupe 1917

Crónica desde la calle Cuba de mi Llopis Ivorra

Agustin Díaz Fernández