QUEÀ DE PRIMUS

QUEÁ DE PRIMUS

Crónica desde la Ronda de la Pizarra.

Pos me sientu a escribil y no pue’o, no me vienin

las ideas a la testud, me ja queda’u jundeau

el pensamientu, peru usteles tiene que compren’er

que es difici el escribir y más p’a los que estu’ios

no tenemus, que no juimos a la escuela,

porqui comu cerruju de torpi semos,

y solo consegui que se enfa’ara conmigo el maestru,

comu voy a po’el escribil si no se conjuga el verbu,

más andu dandu güeltas al pape y a la pluma

tanta que jasta la tinta se ja seca’u, asina que

mejol dejalo quizás otro día cuando amanezca

de nuevu se me ilumine el cabezón

, el casu es que jan pasau muchu tiempu

y con algunas cosas no me aclaru, tengu

mala memoria y de muchas cosas no recuerdu,

de algunas si, de algunas si me acuerdu, coñu p’os

vamos con ellu:

-Tira p’a Trujillu, p’a las Juertas dijerun, que

de’ste lugal Nusutrus semos, de ají nuestra nacencia,

de aji los Nuestrus ancestrus-.

El diez y siete dijerun, del mes de junio p’a más seña

Del jañu de 2023, p’a que no nos confundie’mus,

P’a pasal un dia juntinos, p’a pasal un dia de convivencia

Que ya jabia ansia de reuninus, y más dispues de

tantu tiempu sin venos, y p’a recordar cuandu

jeramus niñus, que ya casi t’os semos agüelus, peru

semos t’os de la mesma sangri, t’os de los mesmos

agüelos de la familia Pichaques nos dijerum

y desdi un tiempo, nos nos veiamus n’a más

que p’a entierrus de los nuestrus, de nuestra

familia que ya se fuerun, junus jovenis, estos no

pudierun vivil su tiempo, otros se fuerun de viejus

que la vi’a es efimera, que na’a es eternu.

-Tira p’a Trujillu, p’a las Juertas dijerun,

Que des’te lugal nusutrus semos, de aji nuestra

Nacencia, de aji los nuestrus ancestrus.-

Y allí, en las Juertas, nos reunimos t’os, no sé

Con Claria quien la idea parió,

si jue unu solo o jue la idea dos, los de este día

juntinus, solu por esu ya merecin una ovación

junos jablan de unas cosas, otros jablan de aqu’esto

otrus jablan de los suyus, que, al fin y al cabo

son de los nuestrus, otrus paicin que jablan de lo

mesmo y no se ponin de acuerdu, algunus de que

lindu ti’es el juertu, pero todos icin que bonitu

día estamos pasandu, en estu coinciden t’os,

t’os coindimus en estu.

-Tira p’a Trujillu, p’a las Juertas dijerun,

Que des’te lugal nusutrus semos, de aji nuestra

Nacencia, de aji los nuestrus ancestrus.-

Y allí en las Juertas estuvimus, que era cosa de

Venos, algunus ya tenemus arrugas, con la piel

Acarton¡a y comu Cueru vieju, los más jóvenes

No debin preocupasi, ya les llegara a jellos,

Que lo de las arrugas solo es cuestión de tiempo

Tambien se reco’aron a los que venil no pudierun

Pero se celebrò el momento del reencuentru,

Juimus a comel y comimos, juimos a reir y reimus

Pero sin duda, lo mejol fue el magnificu dia

Con t’os los primus juntinus.

-Tira p’a Trujillu, p’a las Juertas dijerun,

Que des’te lugal nusutrus semos, de aji nuestra

Nacencia, de aji los nuestrus ancestrus.-

Y los que jablan unus, muchu, otros que lo

Jacian menus, otros que atendían a to’as

Las conversaciones a un mesmo tiempu, Peru

t’os juntinus con mucha alegría y contentu

y jasta de tierra extraña vinu, aondi le toco

cruzar el Taju jace cuantu ha, jaci ya de esu

muchu tiempu,y es la mayol de to’a la familia

de los que acuiderun al llamamiento, jue

la jermana de padris y madris nuestrus

y lo bien avisà que se la veía, bien buena

y llena de contentu, rode’a de tantus

sobrinas ellas y sobrinus ellos, y jabia

razonis, ya jabia pasa’u muchoas añus

sin venos, y solu con vela ya es motivu

de alegrias, porque Catalina que es su nombri

no es prima que es tia.

-Tira p’a Trujillu, p’a las Juertas dijerun,

Que des’te lugal nusutrus semos, de aji nuestra

Nacencia, de aji los nuestrus ancestrus.-

Ya me que’e sin palabras, ya no da màs mi

Entendimuntu, ya no se más que icil, pa’mi es mu

Difícil tranmitil lo que en aquella reunión pasemos

Solo que que’e mu agraleciu a los que prepa’arun

El eventu, gracias mil a los anfitriones

Agaleciu por t’o y para to’os, gracias por

La palra de aquel día de reunión, ojalá

Podamus repetil y ojalá podamus volver to’os

Pa'a venos

-Tira p’a Trujillu, p’a las Juertas dijerun,

Que des’te lugal nusutrus semos, de aji nuestra

Nacencia, de aji los nuestrus ancestrus.-

Salud

Agustin Díaz Fernández

@agustinbotines